Хурлын гол сэдэв болох “кластер” бөгөөд эдийн засгийн нэрт онолч Майкл Портерын “Үндэстнүүдийн өрсөлдөх давуу талын онол”-ын төв цөмд багтдаг. Түүний онолоор, кластер нь улс орны өрсөлдөх чадварыг нэмэгдүүлэх чухал хөшүүрэг болдог. Учир нь, газарзүйн хувьд ойр байрлалтай, ижил салбарт үйл ажиллагаа явуулдаг үйлдвэрлэгч, үйлчилгээ үзүүлэгчид болон дэмжих байгууллагуудын хооронд үүсэх уялдаа холбоо, хамтын ажиллагаа нь:

• Нөөц баялгийн үр ашгийг дээшлүүлэх буюу зардлыг бууруулах,

• Эрүүл өрсөлдөөнийг бий болгох,

• Хамтын ажиллагааг өрнүүлэх,

• Инновацийг хурдасгах,

• Чадварлаг хүний нөөц, технологи, судалгаа хөгжлийн байгууллагуудын уялдаа холбоог бэхжүүлэх боломжийг бүрдүүлдэг.

Иймээс кластер нь зөвхөн эдийн засгийн бүтээмжийг нэмэгдүүлэх төдийгүй инноваци, хамтын хөгжил, өрсөлдөх чадварыг дэмжих стратегийн чухал хэрэгсэл болохыг тус хурал, сургалтын хүрээнд онцолж байна.

Монголын Экспортын Кластерын сүлжээний гишүүн байгууллагууд болох Монголын Арьс Ширний Үйлдвэрлэлийн Мэргэжлийн Нэгдсэн Холбоо, Монголын Жимс Жимгэний холбоо, Монголын Ноос Ноолуурын Холбоо, Монголын Гоо Сайхны Бүтээгдэхүүний кластер болон Монголын Ингэний Сүүний кластерын удирдлага болон хамтран ажилладаг бодлого, эрдэм шинжилгээ болон санхүүгийн байгууллагуудын төлөөллөөс нийт 15 хүн энэхүү сургалт, хуралд #ITDM төслийн дэмжлэгтэйгээр оролцож мэдлэг, ур чадвараа хөгжүүлэн ажиллав.

PILOT EN TITLE