Энэхүү арга хэмжээг Олон улсын стандартчиллын байгууллага (ISO), Стандарт, хэмжил зүйн газар (СХЗГ) болон Монгол Улс дахь Олон улсын худалдааг дэмжих төсөл (ITDM) хамтран зохион байгуулж байгаа бөгөөд төр, хувийн хэвшил, олон улсын байгууллага, эрдэм шинжилгээний байгууллагуудын төлөөлөл оролцож байна.

Чуулганы зорилго нь НҮБ-ын Тогтвортой хөгжлийн зорилтуудыг хэрэгжүүлэх, байгаль орчны эрсдэлийг бууруулах, нөөцийн зохистой хэрэглээг дэмжих, бизнесийн байгууллагуудын өрсөлдөх чадвар, инновацийг нэмэгдүүлэхэд чиглэсэн тойрог эдийн засгийн зарчим болон олон улсын стандартуудыг танилцуулахад оршиж байна.

Арга хэмжээг нээж Стандарт, хэмжил зүйн газрын дарга Х.Батжаргал “Монгол улсад тогтвортой хөгжил, тойрог эдийн засгийн тогтолцоог төлөвшүүлэхэд стандартчиллын гүйцэтгэх үүрэг, ач холбогдлыг” чухал гэдгийг онцоллоо.

Мөн Монгол Улс дахь Олон улсын худалдааг дэмжих төсөл (ITDM)-ийн төлөөлөгч Стефан Мозер жижиг, дунд үйлдвэрүүд тойрог эдийн засгийн зарчим болон ISO 59000 стандартыг үйл ажиллагаандаа хэрхэн нэвтрүүлж, ашиглах боломжийн талаар мэдээлэл өглөө.

Чуулганы хүрээнд хуванцар хэрэглээг бууруулах чиглэлээр хэрэгжиж буй олон улсын туршлага, Монгол Улсын стандартчиллын тогтолцоонд тойрог эдийн засгийн стандартыг нэвтрүүлэх боломж, ISO 59000 стандартын багц болон байгууллагын түвшинд хэрэгжүүлж буй сайн туршлагуудыг хэлэлцэж байна.

Энэхүү үндэсний чуулган нь төр, хувийн хэвшил болон олон улсын байгууллагуудын хамтын ажиллагааг бэхжүүлэхийн зэрэгцээ тойрог эдийн засгийн талаарх ойлголтыг нэмэгдүүлэх, цаашид байгууллагууд нөөцийн үр ашигтай хэрэглээг сайжруулах, хог хаягдлыг бууруулах, тогтвортой бизнесийн загварыг хөгжүүлэхэд чухал түлхэц болох ач холбогдолтой юм.

МОНГОЛ УЛСАД ТОЙРОГ ЭДИЙН ЗАСГИЙН ОЛОН УЛСЫН СТАНДАРТЫГ ТАНИЛЦУУЛАХ АНХНЫ ҮНДЭСНИЙ ЧУУЛГАН БОЛЛОО.