МҮХАҮТ болон Европын Холбоо (ЕХ)-ны Монголын олон улсын худалдааг дэмжих (ITDM) төсөлтэй хамтран “ЕХ-ны хөнгөлөлтийн ерөнхий систем (GSP+)-ийн давуу талууд, гарал үүслийн мэдэгдэл гаргах нь” сэдэвт сургалтыг экспортын мэргэжилтнүүдэд 2024 оны 05 дугаар сарын 17-ны өдөр амжилттай зохион байгууллаа. Сургалтын үеэр ЕХ-ны ITDM төслийн үндсэн бус ахлах зөвлөх Стефан Мозер “Монголын экспортлогчдод хамаатай GSP+ системийн давуу талууд”, “Гарал үүслийн дүрэм” сэдвүүдээр танилцуулга мэдээлэл хийв. Дээрх сэдвийн хүрээнд гарал үүслийн дүрмийг хэрхэн ашиглах, экспорт хийхэд тулгарч буй асуудлын талаар харилцан санал солилцож, шийдлийг хэрхэн олох талаар туршлага хуваалцав. Энэхүү сургалтад төр болон хувийн хэвшлийн мэргэшсэн мэргэжилтнүүдэд болох ХХААХҮЯ, ГЕГ, МҮХАҮТ болон бизнес эрхлэгчдийн 30 гаруй төлөөлөл оролцлоо.

Монгол Улс ЕХ-ны Ерөнхий Хөнгөлөлтөд 1991 оноос хамрагдаж ирсэн. ХЕС-д хамрагдсанаар Монгол Улсаас гарал үүсэлтэй 7200 орчим нэр төрлийн бараа, бүтээгдэхүүн гаалийн хөнгөлөлттэй тарифаар ЕХ-ны зах зээлд нэвтрэх боломжтой болсон юм. Манай экспортын бараа, бүтээгдэхүүн ЕХ-ны зах зээлд ижил төрлийн өрсөлдөгч бүтээгдэхүүнээс хямд өртгөөр нэвтрэх давуу талтай болж үйлдвэрлэл, экспорт, гадаадын хөрөнгө оруулалт, хоёр талын худалдаа, эдийн засгийн хамтын ажиллагаа улам өргөжиж байна. Хөнгөлөлтийн ерөнхий системийн (GSP+)-ийн хүрээнд ЕХ-ны Монгол Улсад олгодог тарифын хөнгөлөлтийг 2027 он хүртэл сунгажээ.

ЕХ-ны Tram төслийн дэмжлэгтэйгээр Нэмэлт Хөнгөлөлтийн Ерөнхий Системийн хүрээнд Европын Холбооны импортын барааны гаалийн татварын хөнгөлөлт эдэлж буй бүтээгдэхүүний гарал үүслийн бүртгэлийг цахимжуулж, түүнийг Монгол Улс 2020 оны 01 дүгээр сарын 01-ний өдрөөс эхлэн ЕХ-ны REX буюу “Бүртгэгдсэн экспортлогчдын систем”-ийг нэвтрүүлэн хэрэгжүүлж байна. Өнөөдрийн байдлаар 168 ААН, 36 хувь хүн “Бүртгэгдсэн экспортлогчдын систем”-д бүртгүүлээд байна.

2023 онд манай улсаас Европын Холбооны орнууд руу 138 сая ам.долларын экспорт хийсэн бол ЕХ-ны орнуудаас Монгол Улс 814 сая.ам.долларын бараа бүтээгдэхүүн импортолсон байна.

ЭКСПОРТЫН МЭРГЭЖИЛТНҮҮДЭД ЗОРИУЛСАН СУРГАЛТ ЗОХИОН БАЙГУУЛЛАА.